اول خطوه فى تصميم الأزياء
بشوف أسأله كتير عن إزاي أعرف أصمم أو ازاي اخد خطوه ف موضوع تصميم الازياء او مثلا انا نفسي ابقي مصممه أزياء بس مبعرفش أرسم أو حد يقول انا جوايا الموهبه بس مش عارفه أبدأ منين ولا أتوجهه ازاي؟!!
فانا
هقولك بعض النصايح اللي ممكن تفيدك ف الموضوع دا....
اول حاجه لازم انك تخصصي وقت انك تدربي وتتمرني كويس عشان تكتسبي
خبره بمعني انا مقصدش التدريب والتمرين ف المعاهد والكورسات فقط ,لا اقصد انك
تدربي مع نفسك في بيتك اقرأي اكتر عن المجال وابحثي عنه كويس...
ومن هنا هتحتاجي تستثمري فيه مع
نفسك في تفكيرك وابداعاتك طيب انا استثمر ازاي وانا معنديش فلوس كافيه ؟! يعني مش
شرط ان يكون معاكي مبالغ عاليه لا انتي ممكن تبدأي بأقل مبلغ معاكي مع الايام
هتكبري اكتر ويتوفر معاكي فلوس اكتر اللي تهيأك انك تدربي او تشتركي في منظمات متخصصه
ف المجال دا...
فأنتي لازم تبذلي جهد كبير انك
تتعلمي وتبحثي عن المعلومات ومصادر الالهام الموضوع هياخد وقت معاكي ف الاول لكن
لو كنتي فعلا بتعشقي مجال تصميم الازياء فهيكون
الجهد والوقت الطويل اللي بتبحثي فيه عن المعلومات هو المتعه الحقيقه...
بعد كده ابدأي خططي لنجاحك ف المجال
خططي كم من وقت هتحتاجيه وانتي بتدربي؟ وكم من ساعه تقريبا؟ وكم من الفلوس اللي
بامكانك انك تخصصيها لتشتري ادوات التصميم ودورات وغيرها؟
بعد كده انا بفضل انك تختاري نوع
التصميم اللي انتي شايفه نفسك قادره تبدعي فيه اكتر فمثلا في ناس بتحب
تصميم فستان السواريه وفى نوعيه تانيه
بتفضل تصميم
فساتين الزفاف فقط وناس بتفضل الكاجول وهكذا فالاحسن ليكي انك تختاري المجال اللي انتي شايفه
نفسك فيه والاحسن انك تتخصصي حاجه واحده وتحطي تركيزك كله فيها عشان تقدري تتفوقي
فيها اكتر لان اوقات بشوف ناس بتعمل لبس رجالي وحريمي ف نفس الوقت وف الاخر
مبينجحوش او بمعني اصح مبيكنش عندهم الشئ اللي يميزهم....
ليست هناك تعليقات:
إرسال تعليق